Şiyarkirina Gele Kurd Di Hizren Seide Kurdi de

Seîdê Kurdî, ji aliyê helwestên xwe yên siyasî û hizrên xwe yên civakî ve ji gelê Kurd re nirxekî dîrokî ye. Lewra di destpêka sedsala bîstemîn de û di dawiya temenê Dewleta Osmanî de, di demeke zû de çawa ku serê xwe bi curbicur pirsgirêkên gelên Misilman re êşandiye, bi heman rengî û zêdetir jî çareseriya pirsgirêkên gelê Kurd ên siyasî, civakî û çandî jî ji xwe re kiriye armanc. Wî xwestiye ku berî her tiştî bi civaka Kurd re hişmendiyeke mîllî çêbibe û di bin şert û mercên wek hev de sîstemeke siyasî ya “Yekîtiya Gelên Misilman” pêk were. Digel ku projeya siyasî ya ku Seîdê Kurdî ji bo curbicur gelên ku di bin sîwana Dewleta Osmanî de dijiyan pêşniyaz dikir negîhaşt hedefê jî, lêbelê hizrên wî ji bo şiyarkirina wan gelan pir girîng in. Bi taybetî jî hizrên wî yên ku derheqê şiyarkirina gelê Kurd de derbirîne, di mesabeya “manîfestoyên ronesansa Kurdan” de ne û ev manîfesto di destên me de ne. Loma jî ne guncaw e ku Kurd ji wan hizrên wî yên girîng re bîgane bimînin û pêwist e ku ji her gelî zêdetir Kurd li wan hizr û nirxan xwedî derkevin, da ku armanca wî ya rizgarbûna ji nezanî, xizanî û îxtîlafê pêk were.